३ महिनामा निष्क्रिय कर्जा ३ अर्ब थप

काठमाडौं, पुस २६ - आर्थिक वर्षको पहिलो त्रैमासिकमा वाणिज्य बैंकहरूको निष्क्रिय कर्जा अनुपात ३ दशमलव १५ प्रतिशत पुगेको छ । यो वर्ष २ अर्ब ९३ करोड रुपैयाँले यो रकम बढेर १५ अर्ब १५ करोड रुपैयाँ पुगेको हो । गत आर्थिक वर्षबाट वृद्धि हुन थालेको निष्क्रिय कर्जा ३ महिनामा ० दशमलव ६१ प्रतिशतले बढेको हो । गत आर्थिक वर्षको अन्तिम त्रैमासिकमा यो २ दशमलव ५४ प्रतिशत थियो ।

'पछिल्लो समयमा यो बढ्ने क्रममा देखिएको छ,' राष्ट्र बैंकका एक अधिकारीले भने, 'विभिन्न कारणले वृद्धिलाई सहयोग गरेको देखिन्छ ।' यसको मुख्य कारणका रूपमा घरजग्गा क्षेत्रमा देखिएको सुस्तता रहेको उनले बताए । बजेट ढिलो आएर विकास निर्माणमा सरकारले खर्च गर्न नसक्नु, तरलता अभावजस्ता कुराले पनि यसलाई सहयोग गरेको उनले जानकारी दिए । खराब कर्जाबाट हटेका केही ऋणको रकम भुक्तानी हुन छाडेपछि पुन निष्क्रियमा गाभिएर पनि यो बढेको हुन सक्ने उनले बताए । बैंकर्स संघका अध्यक्ष ससिन जोशी पनि घरजग्गा क्षेत्रको असर बैंकिङमा परेको बताउँछन् । 'सबै बैंकबाट विवरण आइसकेको छैन,' जोशीले भने, 'घरजग्गा र केही उद्योगको ऋण खराब भएर यस्तो भएको हुन सक्छ ।

घरजग्गा व्यवसायी पनि केन्द्रीय बैंकले लगानीमा कडाइ गरेपछि खराब कर्जा बढ्दै गएको बताउँछन् । 'घरजग्गाले अर्थतन्त्रको मेरुदण्डका रूपमा काम गरेको थियो,' जग्गा तथा आवास विकास संघका महासचिव मीनमान श्रेष्ठले भने, 'पछिल्ला नीतिका कारण वित्तीय क्षेत्र धराशायी हुन सक्ने देखिन्छ ।' अन्य विभिन्न उद्योगसँग जोडिएको भए पनि घरजग्गा कारोबारलाई हेर्ने दृष्टीकोणका कारण समस्या आएको उनले बताए ।

अर्का एक व्यवसायी हाउजिङका व्यवसायीभन्दा जग्गाको मूल्य बढाएर फाइदा लिनेहरू समस्यामा परेकाले ऋण तिर्न नसक्ने अवस्थामा पुगेको बताउँछन् । 'जग्गाको मूल्यबाट फाइदा लिनेलाई अहिले सबैभन्दा समस्या छ,' उनले भने, 'ब्याज तिर्न नसक्ने अवस्थामा बैंकले ऋणको २५ प्रतिशत फिर्ता मागिरहेका छन् ।'

राष्ट्र बैंकको तथ्यांकअनुसार वाणिज्य बैंकले घरजग्गामा ९८ अर्बभन्दा बढी लगानी गरेका छन् । यो रकम हाउजिङ, अपार्टमेन्ट, व्यापारिक भवन र अन्य प्रकारका घरजग्गामा दिइएको ऋण हो । आर्थिक वर्षको पहिलो त्रैमासिक विवरणअनुसार वाणिज्य बैंकले कुल लगानीको २० प्रतिशतका हाराहारीमा घरजग्गा क्षेत्रमा ऋण प्रवाह गरेका छन् । यो कुल निक्षेपको १६ प्रतिशत हाराहारी हुन्छ ।

कुल लगानीमध्ये सबैभन्दा धेरै जग्गामा भएको छ । बैंकहरूले ४६ अर्ब रुपैयाँ जग्गामा लगानी गरेका छन् । यसबाहेक ३५ अर्बको लगानी बसोबासका लागि प्रयोग हुने हाउजिङ र अपार्टमेन्टमा भएको छ । १३ अर्ब रुपैयाँ व्यावसायिक भवन र अपार्टमेन्ट निर्माणका लागि ऋण दिइएको छ । सबैभन्दा थोरै लगानी व्यावसायिक भवनलाई दिइएको ऋणमा भएको छ । राष्ट्र बैंकको तथ्यांकअनुसार २ अर्ब ९० करोड रुपैयाँ यस क्षेत्रमा लगानी गरिएको छ । निजी क्षेत्रमा सबैभन्दा ठूलो सञ्जाल भएको इन्भेस्टमेन्ट बैंकको घरजग्गा क्षेत्रमा पनि सबैभन्दा धेरै लगानी छ । तथ्यांकअनुसार इन्भेस्टमेन्ट बैंकले १० अर्बभन्दा बढी घरजग्गामा लगानी गरेको छ । तर यसको निष्क्रिय कर्जाको अनुपात भने ० दशमलव ६४ प्रतिशत मात्र छ । पछिल्लो समयमा खुलेका जनता र मेगा बैंकले यस क्षेत्रमा सबैभन्दा कम लगानी गरेका छन् ।

प्रकाशित मिति: २०६७ पुस २६ ०९:३६

From: रोशन अधिकारी, http://www.ekantipur.com/np/2067/9/26/full-story/323296/